Churz vor Wiahnachta bin i uf zmol ganz schnell in da Arma vom Mami und am Papi gsi. DÄrzt und dPflegerinna hend üs fasch nia allei loh, immer wieder hend sie üs gstört bim gägasitiga Kennalerna... aber sMami het miar immer wieder gseit, dass das scho guat isch. SMami het das allerwelts Virus ufgschnappt wo i no a paar Wucha im warma Mamibuuch gsi bin. Nochher het sie au no a Schwangerschaftsvergiftig verwütscht und drum han i's denn uf eimol pressantig ka. Zum Glügg het min Papi so guat ufs Mami gluagt, denn so wiani das kört han, isch das en rechta Marathon gsi.

 

Nochdem i mini erscht Nacht ima Wiegali verbrocht han, isch denn am Morga dFrau Doktor cho und het am Mami und am Papi gseit, dass öpis mit mina Auga nid ganz stimmt. I han miar nid gross öpis dabii denggt aber vor allem s'Mami isch us allna Wolka keit. Sie hend sich beidi fescht Sorga um mis Augaliacht gmacht. 

 

Es isch ab denn gaaanz vieles passiart. Dr Augaarzt vo Chur isch sofort is Spitol cho und het probiart usazfinda, was gnau nid stimmt. Dä het zwor gseh, dass eba öpis isch aber au er het nid viel meh traut zum säga. Er het drum grad empfohla, dass miar uf St. Galla söllend. Zersch aber han i für 1 Nacht i mis neua Dahai töffa go pfuusa. Miar hend zäma Wiahnachta gfiiret, das isch sooo schön gsi. Am nögschta Tag sind miar denn uf St. Galla gfahra... Döta hets denn grad a paar Lüt ka, wo uf üs gwartet hend. Eina isch en Spezialischt gsi und dä het vermuatet ka, dass mini Rägabogahut entzündet isch (Iritis) und au, dass i en Graua Star han (Cataract). Das isch ganz ganz schlimm gsi fürs Mami und für da Papi. Sie hend sich sehr grossi Sorga gmacht und hend nüma gwüsst wia wo was...

 

Will niamer no immer nid recht gwüsst het was i han, hends üs Drüü grad uf direktem Weg is Chinderspitol in Chur gschiggt. Nochma churza Zwüschahalt a däm no ganz neua Dahai für mi, simer wieder ines Spitol uf Notufnahm.

 

Döt hend sie üs erklärt, dass sie miar s'Ruggamark punktierend. I han nid gnau gwüsst warum sie das machend, aber i han gmerggt, dass es sehr wichtig isch. Das hends gmacht zum usafinda, ob mini Entzündig mit mim Hirn ztua het oder eba nid. Sie hend mi zersch no piekst zum en langa Schluuch aamacha. Über dä lang dünn Schluuch hends miar i da nögschta zwei Täg Antibiotika und Virostatika geh zum bekämpfa, was vilicht no i mina Auga Seich macht und wo miar vilicht chönd stoppa. S'Mami und au mi hend d'Dökter immer wieder teschtet, zum usafinda warum i dia Sehchrankheit han. Aber jedes Testergebnis isch negativ gsi... und sie hend wieder vo vorna müasa aafanga. Sie hend miar au amol mit sonera chüahla Salbi ufm Chopf i mis Hirni gluagt, zum uuschlüssa, dass öpis Gföhrlichs in miar wachst.

 

I han viel gschlofa in dära Zit. Da Papi het bis spot ind Nacht recherchiart und het mitm Mami denn besprocha, dass dia Lüt im Spitol doch no meh chönd macha für mi. Am nögschta Morga denn het s'Mami für mi kämpft und miar hend denn trotz Fäschttäg und allna Umständ so schnell wia möglich nomol uf St. Galla chöna zum mitma Ultraschallgrätli mini Auga z'teschta. Dia Lüt im Spitol in St. Galla hend mit so speziella Grätli, wo luschtig ruuschend wills mit Wasser funktioniart, mini Auga dursuacht. S'Mami und da Papi und dia Frau und dä Dokter, woni scho kennt han, sind uh froh gsi het sich nid en Tumor i mina Auga versteckt. Das mol hend d'Lüt üs gseit, dass das wo i han, nur 4 anderi Babys hend uf da Welt. Das het s'Mami wieder zum brööla brocht. 

 

Miar sind denn zrugg in üses super Chranggahuuszimmer, wo direkt näbet em Heliplatz gsi isch. I bin froh gsi, dass s'Mami wenigschtens in däna Moment, wo d'Helis gstartet und glandet sind, churz Freud ka het. Wo denn immer meh klar gsi isch, was i han

hend denn dia Lüt in St. Galla öpis vo operiara verzellt. Sie hend mina Eltera erklärt, dass es wichtig isch, dass das bald passiara söt, will mini Auga scho bald wend afanga luaga. Und wenn ma no lang wartet, denn isch es vilicht zspot. Drum hend miar denn scho bald en Termin übercho. Aber zersch hend sie mi denn afanga blooga mit Cortisontröpfli. Dia hend mi zwor immer brennt, aber i han schnell gwüsst, dass es dia bruucht, dass d'Iritis verschwindet. Denn mit dära Entzündig chama nid min Graua Star operiara.

 

Zum Glügg hend miar Drüü denn amol chöna mis neu Dahai go gnau aluaga. I bin jo döta erscht ei Nacht gsi. In däna paar Wucha het mis Mami gmeint, dass a halbs Johr verbii isch. Sie het nämli alles uf dära Welt wela probiara, wo mina chrangga Äugli helfa chönt. Miar hend zwei Homöopatha bsuacht, miar sind is Appazell gfahra, wo en liaba Maa miar gaaanz fiini Nödali i mini Füass und Händ gsteckt het (Augaakkupunktur), s'Mami het gaaanz viel telefoniert und mitm Computer gschriba. Mit Lüt, wo Büacher über Naturheilkund gschrieba hend, mit öperem wo sich mit Bio-Resonanz uskennt, mit minera Hebamma, mit ama andera Augaakkupunkteur und no meh Lüt. Aber es isch so viel gsi, i bin doch nüma drus cho...

 

Mis Mami het amol zum Papi gseit, dass sie ALLES probiara wet, bevor da Proffessr mi operiara tuat und mini Linsa für immer usaneh muass. Sie het nid wela, dass es denn spöter heisst: warum hesch nid? Das hetisch au chöna probiara usw. Bis üsa Liablingshomöopath zu ihra gseit het: Frau Fratschöl hörend sie uuf, sie machend z'viel. 

 

Mini Eltera hend denn besprocha, dass alles ander abbrocha wird, d'Homöopathie mi aber witer begleita söll. Dr Homöopath het mi ab denn für jedi Operation mit sinera Medizin vorbereitet und so mini Selbschtheiligschräft gstärkt.

 

Am 26. Januar 2021 und noch a paar witera Untersüach und Anästhesiegspröch isch es denn sowit gsi, am Morga am 7i sind miar in St. Galla gsi. I han aber nid gmerggt, dass miar im Auto gfahra sind. I han doch no pfuuset. :-) Am 8i denn bin i denn scho wieder mit Zauberluft iipfuuset und sie händ mi denn öpa noch 1.5 Stund verwacha loh. Ali sind glügglich gsi, dass es so guat glaufa isch. Vor allem aber s'Mami und da Papi. I bin zäma mitm Mami im Chranggaauto is Chinderspitol gfahra, döt hend sie mi überwacht und miar hend ei Nacht döt pfuuset. Wo miar denn hei sind, het da Papi und s'Mami mi immer wieder müasa plooga. I han bis zu 4 verschiedeni Sorta Augatropfa ka und han pro Aug bis zu 11 Mol an einem Tag a Tröpfli übercho. A paar händ au brennt, aber da Papi und s'Mami erklärend miar immer, warum sie das machend.

 

Öpa 2 Wucha spöter han i denn so a komischs schwabeligs füechts Ding übercho, wo uf mim rechta Aug chläbt. Es heisst: Kontaktlinsa. Und nomol zweiahalb Wucha spöter sind miar Drüü wieder uf St. Galla zum mis linka Aug operiara. Im Gägasatz zum erschta Aug, wo sich mini Linsa gär nid richtig usbildet het (Aphakie), isch bim linka Aug d'Linsa zwor usbildet gsi aber sie isch nid ganz an ihrem Platz gsi, wo sie het müasa sii. Miar hend denn nomol 2 Wucha gwartet und denn han i zerscht Mol beidi Linsa gliichzitig aakah. 

 

S'Mami und da Papi hend en rechta Chrampf ka mit ina tua woni no ganz chlii gsi bin.

Jetz mit bald 8.5 Mönet gots scho recht guat, aber folga und still heba will i denn doch au nid immer. Aber will s'Mami immer seit, dass sie us miar en Adler macht, bini mängmol sogar ganz ruhig und tua denn anaheba.

 

Aber nomol churz zrugg zum März 2021, sus fählt öpis i da Gschicht. Bi da Untersüach in St. Galla hend mini beida Ärzt usagfunda, dass wieder öpis nid stimmt. Mini Hornhuut isch trüab worda und mini Auga sind uf eimol ganz hart gsi. Mr seit dem Glaukom. Das bedütet, dass dr Augainnadruck z'hoch isch. Drum han i wieder neui Tröpfli übercho zum dr Druck senka. Aber leider hend dia Tröpfli nid würggli chöna helfa. Immer wieder händ mini zwei Kämpfer ghofft, dass mini Ärzt in St. Galla an einem Tag guati Wert messend. Aber es het immer wieder gwechslet. Und drum händ s'Mami und da Papi denn Jo gseit zu minera letschta Operation, wo sie dr Grüan Star behandlet hend (Glaukom). 

 

Am 8. Mai 2021 isch denn dr Spezialischt, wo eigentlich nur in Lausanne operiart extra uf St. Galla cho und het mi zäma mitm Anästhesieteam vo St. Galla behandlet. S'Mami und da Papi hend sich fescht Sorga gmacht im Wartezimmer und sind denn fescht froh gsi wo sie gseit hend, dass alles guat ganga isch. Will i noch däm Iigriff mini Kontaktlinsa a Wiili nüma han chöna träga, het miar en fründlicha Optiker in Chur dia chlinscht Brilla gmacht, wo's git. Drum gseht mr mi mängmol au mit minera coola Brilla. 

 

Noch dr Operation isch min Augainnadruck zwor grad aba, aber halt au wieder ufa... er het sich nid richtig iigstellt und es het denn wieder gheissa, dass mr sus nomol operiart. Aber mis Mami het a uuh guats Buuchgfühl, wo ihra immer gseit het, dass i eifach no meh Zit bruucha. 

 

Jetz isch es Auguscht und s'Mami het i dr Klinik zäma mitm Professor in St. Galla gjublet! Mini Wert sind entlich perfekt und miar müand nüma operiara.

​

...

​

​

​